ನಾ ಒಬ್ಬಂಟಿಯಾದಾಗ

ತೀರದ  ಬಯಕೆಗಳು

ಗುಡುಗಿನಂತೆ ಒಂದರ ಹಿಂದೆ 

ಒಂದೊಂದು ಗುಡುಗಿರಲು 

ಮನಸ್ಸು ಮುದುರಿ ಮೂಲೆ ಸೇರಿತು 

ನಾ ಒಬ್ಬಂಟಿಯಾದಾಗ ॥ 

ಕಾಡುವ ನೆನಪುಗಳು 

ಗಾಳಕ್ಕೆ ಸಿಕ್ಕಿದ ಮೀನಿನಂತೆ 

ಒದ್ದಾಡಿ ಒದ್ದಾಡಿ ಸಾಯುತಿರಲು 

ಮನಸ್ಸು ಚದುರಿ ಮೂಲೆ ಸೇರಿತು 

ನಾ ಒಬ್ಬಂಟಿಯಾದಾಗ ॥

ಜೋರಾಗಿ ಬೀಸಿದ ಗಾಳಿಗೆ
ಧೂಳು ತುಂಬಿದ ಬಾಳಪುಸ್ತಕದ ಪುಟಗಳು
ಜೋರಾಗಿ ಬಡಿಯುತಿರಲು

ಮನಸ್ಸು ಹೆದರಿ  ಮೂಲೆ ಸೇರಿತು 

ನಾ ಒಬ್ಬಂಟಿಯಾದಾಗ ॥

ಮೂಲೆ ಸೇರಿದ ಮನಸನು
ದೂರದ ಮಸಣವು ಕೈಬೀಸಿ
ತನ್ನತ್ತ ಸೆಳೆಯುತಿರಲು
ಮನಸ್ಸು ಎಗರಿ ನಾ ಬದುಕುವೆನೆಂದಿತು
ನಾ ಒಬ್ಬಂಟಿಯಾದಾಗ ॥

--

ಗುರುರಾಜ