ಏಕೆ ನೀವು ಹಾಗೆ ನೋಡುವಿರಿ
ನೀವು ಎಣಸಿದಂತೆ ಏನೂ ಇಲ್ಲ
ನಾ ಅವನಂತೆ ಕಾಣುವ ಪಾತ್ರಧಾರಿ ಹೊರತು
ನಾ ನಿಜವಾದ ಗಾಂಧಿ ಮಹಾತ್ಮನಲ್ಲ ।।
ಕಾಲ ಕಳೆದಂತೆ ಮಾಸಿಹುದು
ಆ ತಾತನ ನೆನಪು, ಇದು ಸುಳ್ಳಲ್ಲ
ಅವನ ನೆನಪಿಸುವುದೇ ನನ್ನ ಕಾರ್ಯ ಹೊರತು
ನಾ ನಿಜವಾದ ಗಾಂಧಿ ಮಹಾತ್ಮನಲ್ಲ ।।
ಸತ್ಯ ನುಡಿದ ಸಂತನಾತ
ಶಾಂತಿ ಸಾರಿದ ಛಲದಂಕ ಮಲ್ಲ
ಆತನ ತತ್ವಗಳನ್ನು ಸಾರುತಿಹೆ ಹೊರತು
ನಾ ನಿಜವಾದ ಗಾಂಧಿ ಮಹಾತ್ಮನಲ್ಲ ।।
ಅಹಿಂಸೆ ಶಾಂತಿಯ ಪ್ರತೀಕನಾತ
ಆತನ ಸಮನಾರು ಇನ್ನು ಹುಟ್ಟಿಲ್ಲ
ಆತನ ವೇಷದಲಿ ಜೀವನ ನಡೆಸುತಿಹೆ ಹೊರತು
ನಾ ನಿಜವಾದ ಗಾಂಧಿ ಮಹಾತ್ಮನಲ್ಲ ।।
---
ಗುರುರಾಜ್ ಎಂ ಜೆ